ਸਾਫ਼ਟਵੇਅਰ ਕੀ ਹੁੰਦੇ ਹਨ?

ਸਾਫ਼ਟਵੇਅਰ ਇੱਕ ਤਰ੍ਹਾਂ ਦਾ ਪ੍ਰੋਗਰਾਮਾਂ ਦਾ ਸਮੂਹ ਹੁੰਦਾ  ਹੈ ਜੋ ਕਿ ਕੰਪਿਊਟਰ ਵਿੱਚ ਵੱਖ-ਵੱਖ ਤਰ੍ਹਾਂ ਦੇ ਕੰਮ ਕਰਨ ਲਈ ਵਰਤਿਆ ਜਾਂਦਾ ਹੈ। ਇਸਦੀ ਮਦਦ ਨਾਲ ਗਣਿਤਕ ਅਤੇ ਹੋਰ ਕਿਸਮ ਦੀਆਂ ਸਮੱਸਿਆਵਾਂ ਦਾ ਹੱਲ ਤੇਜ਼ੀ ਨਾਾਲ ਕੀਤਾ ਜਾ ਸਕਦਾ ਹੈ। ਹਰ ਕੰਮ ਨੂੰ ਕਰਨ ਲਈ  ਉਸ ਨਾਲ ਸਬੰਧਿਤ ਸਾਫ਼ਟਵੇਅਰ ਹੁੰਦੇ ਹਨ; ਜਿਵੇਂ ਗਣਿਤਕ ਸਮੱਸਿਆਵਾਂ ਦੇ ਹੱਲ ਲਈ ਹੋਰ ਸਾਫ਼ਟਵੇਅਰ , ਵਪਾਰਕ ਜਾਂ ਅੰਕੜਾ ਭੰਡਾਰਨ ਲਈ ਹੋਰ ਸਾਫ਼ਟਵੇਅਰ ਹੁੰਦੇ ਹਨ। ਇਸ ਤਰ੍ਹਾਂ ਲੋੜ ਮੁਤਾਬਿਕ ਕਾਫ਼ੀ ਜ਼ਿਆਦਾ ਕਿਸਮਾਂ ਦੇ ਸਾਫ਼ਟਵੇਅਰ ਹੁੰਦੇ ਹਨ ਪਰੰਤੂ ਤਕਨੀਕੀ ਤੌਰ ‘ਤੇ  ਇਹਨਾਂ ਦੀ ਵੰਡ ਇਸ ਤਰ੍ਹਾਂ ਕੀਤੀ ਗਈ ਹੈ:

1. ਸਿਸਟਮ ਸਾਫ਼ਟਵੇਅਰ
2. ਐਪਲੀਕੇਸ਼ਨ ਸਾਫ਼ਟਵੇਅਰ

ਇਹ ਵੀ ਦੇਖੋ:  ਪ੍ਰੋਗਰਾਮਿੰਗ ਭਾਸ਼ਾ ਬਾਰੇ ਜਾਣੋ

ਸਿਸਟਮ ਸਾਫ਼ਟਵੇਅਰ: ਇਹ ਸਾਫ਼ਟਵੇਅਰ ਕੰਪਿਊਟਰ ਨੂੰ ਚਲਾਉਣ ਲਈ ਬਹੁਤ ਜ਼ਰੂਰੀ ਹੁੰਦੇ ਹਨ। ਇਹਨਾਂ ਦੀ ਬਣਾਵਟ ਅਜਿਹੀ ਹੁੰਦੀ ਹੈ ਕਿ ਇਹ ਹਾਰਡਵੇਅਰ ਨੂੰ ਵਰਤੋਂਕਾਰਾਂ ਵੱਲੋਂ ਦਿੱਤੀਆਂ ਜਾ ਰਹੀਆਂ  ਹਦਾਇਤਾਂ ਮੁਤਾਬਕ ਕਾਬੂ ਕਰਦੇ ਹਨ। ਇਹਨਾਂ ਤੋਂ ਬਗੈਰ ਕੰਪਿਊਟਰ ਨਹੀਂ ਚੱਲ ਸਕਦਾ । ਪ੍ਰਮੁੱਖ ਸਿਸਟਮ ਸਾਫ਼ਟਵੇਅਰ – ਆਪਰੇਟਿੰਗ ਸਿਸਟਮ ਭਾਵ ਸੰਚਾਲਕ ਪ੍ਰਣਾਲੀ, ਯੂਟਿਲਟੀ ਪ੍ਰੋਗਰਾਮ, ਕੰਪਾਈਲਰ, ਆਦਿ ਹੁੰਦੇ ਹਨ।

• ਆਪਰੇਟਿੰਗ ਸਿਸਟਮ – ਮਾਈਕਰੋਸਾਫ਼ਟ ਵਿੰਡੋਜ਼, ਮੈਕ, ਲੀਨਕਸ, ਯੂਨਿਕਸ, ਐਂਡਰੌਇਡ ਅਤੇ ਆਈ.ਓ.ਐਸ ਇਸਦੀਆਂ ਕੁਝ ਉਦਹਾਰਨਾਂ ਹਨ।
• ਯੂਟਿਲਟੀ ਪ੍ਰੋਗਰਾਮ – ਐਂਟੀ-ਵਾਇਰਸ, ਫਾਈਲ ਪ੍ਰਬੰਧਨ, ਡਿਸਕ ਸਾਂਭ-ਸੰਭਾਲ ਸਬੰਧੀ ਸਾਫ਼ਟਵੇਅਰ  ਇਸਦੀਆਂ ਕੁਝ ਉਦਹਾਰਨਾਂ ਹਨ।
• ਕੰਪਾਈਲਰ, ਡੀਬੱਗਰ, ਅਸੈਂਬਲਰ।

ਇਹ ਵੀ ਦੇਖੋ: ਐਂਡਰੋਇਡ ਫ਼ੋਨਾਂ ਵਿੱਚ ਮਿਲਣ ਵਾਲੀ .nomedia ਫਾਈਲ ਬਾਰੇ ਜਾਣੋ

ਐਪਲੀਕੇਸ਼ਨ ਸਾਫ਼ਟਵੇਅਰ: ਇਹ ਸਾਫ਼ਟਵੇਅਰ ਕੰਪਿਊਟਰ ਲਈ ਜ਼ਰੂਰੀ ਨਹੀਂ ਹੁੰਦੇ। ਕੰਪਿਊਟਰ ਇਹਨਾਂ ਤੋਂ ਬਗੈਰ ਵੀ ਚੱਲ ਸਕਦਾ ਹੈ। ਪਰ ਇਹਨਾਂ ਦੀ ਵਰਤੋਂ ਵਰਤੋਂਕਾਰਾਂ ਦੀਆਂ ਲੋੜਾਂ ਉੱਪਰ ਨਿਰਭਰ ਕਰਦੀ ਹੈ। ਇਹ ਸਾਫ਼ਟਵੇਅਰ ਕਿਸੇ ਵਰਤੋਂਕਾਰ ਦੀ ਕਿਸੇ ਖਾਸ ਲੋੜ ਨੂੰ ਪੂਰਾ ਕਰਨ ਲਈ ਹੁੰਦੇ ਹਨ। ਉਦਹਾਰਨ ਦੇ ਤੌਰ ‘ਤੇ ਜੇਕਰ ਕੋਈ ਵਰਤੋਂਕਾਰ ਚਿੱਤਰਕਲਾ ਦਾ ਸ਼ੌਕੀਨ ਹੈ ਤਾਂ ਉਹ ਫੋਟੋਸ਼ਾਪ, ਇਲੱਸਟ੍ਰੇਟਰ, ਕੋਰਲ ਡ੍ਰਾਅ, ਗਿੰਪ, ਆਦਿ ਸਾਫ਼ਟਵੇਅਰਾਂ ਵਰਤੇਗਾ ਅਤੋ ਜੇਕਰ ਕੋਈ ਪ੍ਰੋਗਰਾਮਿੰਗ ਵਗੈਰਾ ਦਾ ਸ਼ੌਕੀਨ ਹੈ ਤਾਂ ਡ੍ਰੀਮਵੀਵਰ, ਐਕਲਿਪਜ਼, ਟਰਬੋੋ ਸੀ, ਆਦਿ ਸਾਫ਼ਟਵੇਅਰਾਂ ਦੀ ਵਰਤੋਂ ਕਰੇਗਾ।

• ਵਰਡ ਪ੍ਰੋਸੈਸਿੰਗ ਸਾਫ਼ਟਵੇਅਰ – ਮਾਈਕਰੋਸਾਫ਼ਟ ਵਰਡ, ਲਿਬਰ ਆਫਿਸ, ਅਡੋਬ ਪੇਜਮੇਕਰ, ਐਪਲ ਪੇਜਿਸ, ਕਿੰਗਸਾਫ਼ਟ ਆਫਿਸ, ਕੁਇੱਕ ਆਫਿਸ ਆਦਿ।
• ਡਾਟਾਬੇਸ ਸਾਫ਼ਟਵੇਅਰ – ਔਰਾਕਲ ਆਰ.ਡੀ.ਬੀ.ਐਮ.ਐਸ, ਆਈ.ਬੀ.ਐਮ-ਡੀ.ਬੀ.2, ਮਾਈਕਰੋਸਾਫ਼ਟ ਐਸ.ਕਿਊ.ਐਲ ਸਰਵਰ, ਟੈਰਡਾਟਾ, ਮਾਈ-ਐਸ.ਕਿਊ.ਐਲ, ਮਾਈਕਰੋਸਾਫ਼ਟ ਐਕਸੈੱਸ, ਆਦਿ।
• ਸਪਰੈੱਡਸ਼ੀਟ ਸਾਫ਼ਟਵੇਅਰ – ਇਹ ਸਾਫ਼ਟਵੇਅਰ ‘ਮਾਈਕਰੋਸਾਫ਼ਟ ਐਕਸਲ ‘ਵਰਗੇ ਹੁੰਦੇ ਹਨ।
• ਡੈਸਕਟਾਪ ਪਬਲਿਸ਼ਿੰਗ ਸਾਫ਼ਟਵੇਅਰ – ਮਾਈਕਰੋਸਾਫ਼ਟ ਪਬਲੀਸ਼ਰਰ, ਅਡੋਬ ਇੱਨਡਿਜ਼ਾਈਨ, ਕੋਰਲ ਡ੍ਰਾਅ, ਕੋਰਲ ਵੈਂਚਿਊਰਾ, ਆਦਿ।